Ta senyala pa yo kuandu muchachu pa mutru
ta enda motru na aplaya, ta mira motru muchu Kolokoy ta kohre na lodu. Tieni din motru ta mira gorehu di Katambosu, pag ya
mira yo kesti di itsa yo patibong di bongbong di kanya. Mutchu ding Parus na orilya di riyo, ta rebata mutro na harena. Pag
ya mira motru Orong-orung ta garya kung lodu. Kabandu motru huga na riyo de enda tamen mihotru na looban, de huga Balis-konde.
Tiene yo konesiw kel muchachu kuandu kel, pag ya huga balis-konde kung motru ta bolbe ya lang eli, bago di sabe motru ta dormi
ya pala. Pag de huga motru otrabes nung kieri ya motru se entra kung eli. Tiene bes pala pag tahuga ya motru tieni di Tira-pedu,
di uwi motru kel suena di pedu, de kohe motru kel ta-eskonde.
Pag ya magsawa ya motru huga bali-eskondi
di enda tameng mihutro na tras di batalan para se boso, mucho Mangbobosu na bahra. Lalo ya pag mahal na araw mucho muher ta
bini na manila, bung blanku blanku ay pierna, ta se manggigil tuloy kel mga mi kumpanyeru. Ta Gutya-babas di mi kumpanyeru
pag ya mira kel pierna.
De sige diya tamen de huga mihutro Alikandoy,
bung buenu buenu kohre kel mga kalaban di motru. Bung buenu din eskonde. Pag ya keda kansaw tamen, de huga ya Panalang. Ta
senyala pa yo esti Danny bung buenu tira ay batu. Palagi eli ta gana kasi kabisaw ya eli ay pamatu. Pag ta huga tamen eli
Tatsing, perdiw todu, bung buenu din asinta, pag ya tira eli kel batu na taya, ta bula todu na puera di guhit. Maski na Pasida,
karkulaw eli pag ya tira, palagi serka na guhit.
Pag nuway ma sen ay mga muchachu di se
lotru Bintol, muchu lotru ta bende lalu ya pag grandi grande ay kuhida. Kel nga pala mi kapitbahay bung buenu se Tah-raya,
di para eli na punta di soya, prepare at tah-raya, di garya eli ay piedra na agwa pag ya sumi ya ay piedra na agwa saka tamen
eli di tira ay tha-raya. Bung muchu eli ta kohe, peskaw, kangrehu, kamaron saka tieni otro pa. Mi lolu Panong bung buenu se
Sugapa, bung alegri tameng yo, pag ta enda yo na riyu para se sugapa. Mucho yo ta kohe, kamaron, kangrehu pati peskaw.
Tuwing letardi o takip-silim de yega ay
mga panteru, mucho lotro kuhida pero tieni din Kalasu, nung kieri lotru ay kalasu kasi bung mutchu esti espinas. De buta ya
lang lotru esti na riyo. Ta senyala pa yo paf ta para yo na orilya na tambak ta se tirador motru kel mga Tig-tigalog, bung
buenu bringka kel mga tig-tigalog, pa-kambya kambya na piedra. Munchu din Salabay, kuandu un bes ta banya yo na riyo, ya se
salabay kung mingu, bung dueli bung ardi kel pantal. Muchu ding Kabalyu-bamba aya na riyo, ta senyala pa yo, ta kohe motru
kabandu ta se motru karera na agwa.
Ta senyala ba bo kuandu kel ta saka motru
Lomboy na sapang. Kaya lang bung muchu hantik na ponu, bung dueli morde. Ensigida motru di baha na ponu kasi ta ma bulabug
ay hantik.
Kuandu kel nga pala bung alegri motri se
dayu na San Jose ta huga Bali-so-keti motru aya kung kel mga muchachu. Pag ta perde ya lotro ta kusya ya lotru kung mihutro.
Pag ta perdi motru ta kore motru na parabahu, de huga ya lang motru Trompu. Pag tameng ya keda kansaw, de huga motru bahay-bahayan
o kasa-kasa, di kose motru na Olya. Pag ya yega ay di nochi di enda motru na kasa di Dizon na agwada para mira telebisyon.
